A pandemia está disparada en España. As baixas laborais por COVID-19 ameazan xa a sectores esenciais. Na última semana, con datos do venres, rexistráronse case un millón de contaxios. A incidencia acumulada subiu case 1.000 puntos, ata superar os 2.700 casos por 100.000 habitantes. A sexta onda xa non só afecta o sistema sanitario, senón tamén a outros servizos esenciais, como a policía, os bombeiros e o transporte público, por positivos ou casos de contacto. As baixas laborais tamén están a poñer en perigo ás pequenas empresas.
E a pesar da complicada situación, este luns mantívose a volta ao cole, tras a pausa do Nadal, con dez millóns de estudantes regresando ás aulas. Nos nenos de 5 a 11 anos, só un de cada tres foron vacinados coa primeira dose, un 32%. En canto aos adolescentes, un 87% recibiron xa a pauta completa.
A incidencia acumulada media entre os menores de 11 anos é superior aos 2.300 (2.317) casos, subindo a 2.900 (2.909) dos 12 aos 19 anos. Aínda que nas rexións máis afectadas esas cifras dóbranse ou case se triplican. En Navarra a incidencia para os pequenos é de máis de 6.000 (6.173) e de máis de 8.000 (8.161) para os rapaces de 12 a 19 anos.