A convocatoria de axudas a anpas que xestionan comedores prestou especial atención aos sobrecustos que supuxo a pandemia. Neste sentido, o orzamento total dividiuse en dous conceptos: un dirixido ao custo diario do menú, mantemento, persoal e limpeza e aos gastos ocasionados pola contratación de pólizas de seguro para a prestación do servizos; e outro destinado a sufragar gastos relacionados coa covid-19 (máscaras, material de desinfección e protección, etc).
Para o cálculo da axuda tívose en conta, en ambos casos, a media de usuarios diarios do comedor escolar, e o seu importe poderá sufragar o 100% do gasto xustificado. Estas subvencións son compatibles con outras axudas para a mesma finalidade.
Son en total 118 as entidades beneficiadas desta convocatoria, para a que a Consellería de Cultura, Educación e Universidade duplicou este ano o orzamento, elevándoo ata os 1,2M€. A finalidade destas axudas é sufragar parte dos gastos nos que incorreron estas entidades na prestación do servizo durante o pasado curso. A relación de anpas adxudicatarias pode consultarse no Diario Oficial de Galicia.