150 persoas participan nos obradoiros de memoria que se celebran en nove parroquias de Carballo 


Coa posta en marcha do último obradoiro, que finalmente se celebra en Cances, xa son 150 as persoas que participan nos cursos de memoria organizados polas concellarías de Benestar e Terceira Idade en nove parroquias do concello. O presidente de Afaber, Jesús Villar, e a concelleira de Igualdade, Benestar e Sanidade, Maica Ures, realizaron unha rolda de visitas a todos os centros sociais, e animaron ás persoas que asisten aos cursos a aproveitar as ferramentas que se lles ofrecen para estimular a mente e retardar o avance dalgunhas das patoloxías máis comúns na terceira idade. No concello de Carballo hai máis de 11.000 persoas maiores de 60 anos, que representan aproximadamente o 35% da poboación. Mellorar a calidade de vida deste colectivo e fomentar o envellecemento activo durante o maior tempo posible é o gran obxectivo das iniciativas que se promoven para axudar ás persoas maiores a recuperar pouco a pouco a súa actividade e as relacións sociais.