Un escape de gas parece ser a causa da traxedia ocorrida no hotel Saratoga da Habana, segundo «investigacións preliminares». De momento, as autoridades cubanas confirmaron nove mortos, 13 desaparecidos e 40 hospitalizados. Con cinco estrelas, o hotel Saratoga é un dos máis luxosos da capital cubana. Atópase nun edificio de estilo neoclásico, en pleno Paseo do Prado. Foi construído en 1880 e empezou a funcionar como hotel en 1933. A súa última renovación foi en 2005. A explosión provocaba o derrube de parte da fachada e un incendio, cuxo fume era visible desde gran parte da cidade. A planta baixa e os dous primeiros pisos, dun edificio de seis, foron os máis afectados. A montaña de entullos que quedou sobre a beirarrúa supera a altura dunha persoa. Ao lugar do sinistro desprazouse o presidente cubano, Miguel Díaz-Canel, xunto co primeiro ministro e o líder da Asemblea Nacional do Poder Popular.
48