A alcaldesa, Inés Rey, anunciou que o Concello porá en marcha un concurso de disfraces nas redes sociais para que a rapazada poida participar desde a casa na celebración deste Entroido atípico. A alcaldesa sinalou que o Concello, tras a decisión de cancelar os festexos, quere manter “viva”, unha das nosas grandes tradicións. Por mor da situación epidemiolóxica derivada da pandemia da COVID 19, convocarase as coruñeses e os coruñeses a gozaren desta festa desde as súas casas.
A alcaldesa animou a veciñanza a disfrazarse nas súas casas e compartir o seu Entroido particular a través das redes sociais (Facebook, Instagram e Twitter).
O Concello publicará a próxima semana as bases para poder participar no concurso virtual, en que se especificarán as categorías, premios, a composición do xurado e os prazos para subir as fotografías. O resultado final publicarase nas redes sociais municipais, onde se subirán as imaxes das gañadoras e dos gañadores e o seu premio correspondente.
A alcaldesa lamentou que a situación sanitaria impida desenvolver o Entroido da maneira tradicional, aínda que espera que o espírito do Entroido coruñés permaneza a pesar da pandemia. “Manter vivas as nosas tradicións é manter viva a nosa cultura, por iso vos animo a todas e todos a participardes”, dixo.