Intensifícanse as protestas en Myanmar. Varios miles de persoas saíron este sábado ás rúas de Rangún coas cores da liga Nacional para a Democracia, o partido de Aung San Suu Kyi, que foi detida o luns. Trátase da maior concentración desde o golpe militar contra o Goberno da Premio Nobel, escudado na suposta fraude nas eleccións parlamentarias de novembro. Os cortes da internet que bloquean o acceso a redes sociais como Twitter e Instagram, nun intento de silenciar a crecente disidencia popular, non impediron que os birmanos se organizasen para manifestarse. O enviado especial da ONU para Birmania falou cos militares. Pediulles que puxesen fin ao golpe de estado e que liberasen aos detidos. Pero o Consello de Seguridade non condenou formalmente o golpe na súa declaración conxunta, pola oposición de China e Rusia.
23