O Boletín Oficial da Provincia (BOP) vén de publicar a convocatoria do programa de axudas que conta cun investimento total de 300.000 euros. A liña de subvencións vai dirixida a entidades sen ánimo de lucro da provincia da Coruña, entre as que se atopan: colexios profesionais, cámaras de comercio, asociacións de veciños e veciñas, agrupacións de mulleres rurais e entidades asociativas e representativas dalgún sector profesional, comercial ou empresarial.
As contías a outorgar, que oscilan entre un mínimo de 1.200 euros e un máximo de 28.000 euros, permitirán ás entidades sinaladas levar a cabo accións como a reforma e mellora de locais sociais; adquisición de mobiliario ou equipamento informático; actuacións de saneamento, abastecemento de auga, acondicionamento de camiños ou iluminación pública; ou investimentos na hostalaría e o comercio para adaptalos á normativa vixente en materias como accesibilidade, equipamentos contra incendios ou instalacións eléctricas, entre outras.
O prazo para presentar solicitudes acaba de abrirse, e finalizará ás 14:00 horas do 26 de abril de 2021. Os trámites deberán realizarse vía telemática a través da plataforma SUBTeL da Deputación.