Con máis de 200 mozos e 25 empresas, a IV Feira da Cámara de Comercio da Coruña clausurouse este xoves en Carballo cun gran éxito de asistencia, consolidando deste xeito o seu papel de feira referente en Galicia, tanto polos seus elevados índices de participación como polo nivel das empresas que acoden á cita da entidade cameral. O foro tivo lugar en Fórum Carballo de 10:00 a 14:00 horas.
O presidente da Cámara de Comercio da Coruña, Antonio Couceiro, foi o encargado de inaugurar a Feira. Na súa intervención, destacou a “vocación de servizo permanente” da entidade cameral coas empresas, ás que animou a solicitar as axudas á contratación a mozos inscritos no Programa Integral de Cualificación e Emprego.
Pola súa banda, o director xeral da Cámara de Comercio, Gonzalo Ortiz, destacou que a Cámara da Coruña está “moi ligada” a esta comarca coruñesa “cun futuro e unhas posibilidades económicas magníficas”. Neste sentido, explicou que toda a comarca, incluída a Costa da Morte, forman parte dun triángulo, que completan Arteixo e Laracha, de gran dinamismo e posibilidades laborais.
O xornalista Luís Fraga, presente na apertura que pechou o alcalde de Carballo, Evencio Ferrero, aconsellou aos mozos para afrontar o proceso de procura de emprego con “esforzo, paixón e moitas ganas” e mostrouse partidario de ter moi presente nese camiño o que definiu como “as tres P: Pensamento Positivo Permanente”.
Por último, Ferrero encomiou a celebración de feiras deste tipo e destacou a potencialidade da comarca de Bergantiños “onde o número de empresas asentadas é moi superior á media de Galicia”.