O presidente do Goberno, Pedro Sánchez, mantivo unha conversación telefónica co rei de Marrocos, Mohamed VI, na que abordaron a nova etapa aberta nas relacións entre ambos os países. Unha etapa baseada na transparencia e a comunicación permanente, o respecto mutuo, o cumprimento dos acordos asinados por ambas as partes, así como a abstención de toda acción unilateral para estar á altura da importancia de todo o que compartimos e evitar futuras crises entre os nosos dous países.
S.M. o rei, Mohamed VI, convidou ao presidente do Goberno, Pedro Sánchez, a realizar unha visita a Rabat nos próximos días para poñer en marcha a folla de roteiro que consolida esta nova relación; unha folla de roteiro ambiciosa, á altura de dous países veciños e socios estratéxicos. O presidente Sánchez viaxará a Rabat acompañado polo ministro de Asuntos Exteriores, Unión Europea e Cooperación, José Manuel Albares Bueno.
S.M. o rei Felipe VI foi informado dos detalles da conversación polo presidente do Goberno.
O Goberno de España asume as relacións con Marrocos como un asunto de Estado. Nese marco, o presidente do Goberno manifestou a súa firme vontade de renovar e profundar a relación privilexiada entre España e Marrocos, cun espírito de estreita cooperación para afrontar xuntos os desafíos comúns e garantir a estabilidade e integridade territorial de España e a prosperidade de ambos os países.