Na travesía participaron once barcos entre os que se encontraban goletas, bergantíns, pailebotes, carabelas e embarcacións da Volvo Ocean Race. Entre eles, a Peregrina, a carabela Beira Cruz, as goletas Evangelina -construída en 1912 no porto do Freixo, na Ría de Noia-, a bilbaína Atyla e a francesa Etoile, o pailebote Pascual Flores, ou o VO70 E1 Ericsson. A travesía Iacobus Maris conmemora a viaxe do corpo do Apóstolo Santiago desde o porto de Jaffa ata Santiago de Compostela, atravesando o Mediterráneo de Oriente a Poñente, e seguindo rumbo norte ata Galicia polo Atlántico.
A directora de Turismo de Galicia, Nava Castro, participou no acto de recepción, xunto á embaixadora de Israel en España, Rodica Radian-Gordor, o cónsul xeral de Rumanía en Bilbao, Marian Popescu, o cónsul Honorario de Italia na Coruña, Francesco Milani, e o presidente da Fundación Traslatio, Mario Cardama Barrientos.