O Concello da Laracha continúa desenvolvendo o programa de actividades de verán, que inclúe propostas especialmente dirixidas aos nenos como medio de ofrecerlles a eles alternativas para o aproveitamento do seu tempo libre e, aos seus pais, unha axuda para a conciliación da vida persoal, familiar e laboral durante as vacacións do verán.
Nesta semana estase a desenvolver a primeira quenda do campamento urbano dirixido a nenos de idades comprendidas entre os tres e os sete anos. Desde o pasado luns e ata o venres están a realizar diversas actividades educativas, deportivas e ludo-recreativas nas instalacións do pavillón do IES Agra de Leborís durante toda a mañá, desde as 9:00 ata as 14:00 horas.
Como proposta educativa complementaria, tamén realizan unha saída a Ponteceso para visitar o Museo Etnolúdico de Galicia (Melga).
Nesta primeira quenda participan 26 nenos nados entre os anos 2012 e 2016. A segunda quenda, dirixida ao mesmo grupo de idade e cun programa de similares características ao desta semana, desenvolverase entre o 5 e o 9 de agosto. O prazo de inscrición permanece aberto e os interesados deben anotarse acudindo á Casa do Concello.
20