A degustación terá lugar este domingo día 6 a partir das 13:00h, na chaira exterior da lonxa de Laxe. A actividade enmárcase na programación das II Xornadas de Pesca Artesanal ‘No Mar da Lonxa de Laxe’, impulsadas pola Confraría de Pescadores. Os asistentes poderán gozar dun menú de 15€ que incluirá navalla-longueirón, fritura de peixe da lonxa con cachelos de Coristanco, pan e bebida.
A exaltación gastronómica non será a única cita culinaria na lonxa durante a fin de semana. Tanto o sábado como o domingo celebraranse talleres gastronómicos para nenos e showcookings para adultos. Estas actividades estarán dirixidas polo cociñeiro Miguel Mosteiro, que preparará en directo varios pratos de peixe e marisco, explicando o paso a paso da súa elaboración e compartindo cos asistentes algunhas das características destes produtos. Os participantes poderán ademais degustar todas as propostas presentadas de forma totalmente gratuíta. As prazas para estas mostras de cociña son limitadas, polo que todos os interesados deberán inscribirse previamente no 608274900.
A maioría das actividades propostas durante estas xornadas teñen como obxectivo profundar nos beneficios da pesca artesanal, responsable e sostible.