Correos volve poñer en marcha no Camiño a Fisterra e Muxía o seu servizo Paq Mochila, para o transporte de mochilas e maletas dun aloxamento a outro. O servizo, que permite aos peregrinos camiñar sen cargar a súa equipaxe, estará dispoñible nos principais Roteiros do Camiño de Santiago.
Ademais do Camiño a Fisterra e Muxía, o servizo de traslado de equipaxes estará dispoñible no Camiño Francés desde Roncesvalles e Somport, no Camiño Portugués desde Tui e A Guarda –incluída a Variante Espiritual-, no Camiño do Norte desde Irún, no Camiño Primitivo desde Oviedo, no Camiño Inglés desde Ferrol, no Camiño de Inverno desde Ponferrada e na Vía da Prata-Camiño Sanabrés desde Ourense.
O funcionamento do Paq Mochila é moi sinxelo. O carteiro pasará a partir das 8.00 da mañá para recoller a equipaxe dos peregrinos que solicitasen este servizo no aloxamento indicado e deixarao no seguinte antes de as 14.30 horas. O Paq Mochila pode contratarse na web www.paqmochila.com a través dun sinxelo formulario dispoñible en nove idiomas.