O Comité Olímpico Internacional, COI, non vai permitir que os deportistas rusos e bielorrusos participen na cerimonia de apertura dos Xogos Olímpicos de París.
O acto inaugural da cita olímpica, previsto o próximo 26 de xullo, vai ser moi diferente ao doutras edicións. Así, en lugar do desfile normal das delegacións dos diferentes países, dentro dun estadio, os cidadáns poderán ver a miles de deportistas de todo o mundo viaxar a bordo de embarcacións polo río Sena, durante varios quilómetros, en dirección cara á Torre Eiffel, epicentro da festa.
O COI sinalou que os deportistas de Rusia e Bielorrusia autorizados a competir nos Xogos Olímpicos, en calidade de neutrais, soamente terán a oportunidade de “vivir o acontecemento”, probablemente, observándoo desde as proximidades do río.
O organismo presidido por Thomas Bach estableceu un procedemento de investigación para que os deportistas rusos e bielorruso obteñan o status de neutrais, con requisitos como: non apoiar publicamente a invasión de Ucraína, ou non estar afiliados a axencias militares, ou de seguridade, dos seus respectivos Estados.