O Mercado Municipal de Malpica acolleu este sábado 2 de xaneiro, a inauguración oficial da exposición “Galería Vinte Vinte”, á que acudiron o alcalde, Walter Pardo, a concelleira de Cultura, Leticia Varela, o concelleiro de Obras, José Ángel Garrido, o concelleiro de Deportes, Miguel Varela, e algunhas das persoas autoras das instantáneas expostas.
Reflectir como foi o confinamento en Malpica. Ese foi o obxectivo que a Concellería de Cultura buscaba cando puxo en marcha o concurso Galería Vinte Vinte. Neste certame, participaron decenas de veciños e veciñas que amosaron, a través de fotografías, como era o seu día a día durante o illamento pola covid-19. Agora, estas imaxes conforman esta exposición no Mercado Municipal de Malpica. Este sábado, durante o evento de presentación, levouse a cabo a entrega de premios ás persoas gañadoras deste concurso:
- “Tormenta no mar” de Sara Tasende (categoría persoas adultas).
- “A nova normalidade” de Paula Anido (categoría xuvenil).
- “Tempo de calma” de Antonio Varela (categoría persoas adultas).
- “Amencer no porto” de Marisol Nieto (categoría persoas adultas).
- “Incerto” de José Manuel Rodríguez (categoría persoas adultas).
- “Cerqueda desde a xanela” de Raquel Bello (categoría persoas adultas).
A mostra estará dispoñible, polo menos, durante un mes durante o horario de atención ao público da instalación.