Organizado polo Concello de Carballo, a través das concellarías de Mocidade e Promoción Económica, o evento consolídase como un dos principais puntos de encontro para profesionais do videoxogo en Galicia e o norte peninsular.
Durante dous días, o congreso ofrecerá charlas, talleres, podcast en directo e concertos, configurando unha programación que combina coñecemento técnico, reflexión creativa e propostas culturais arredor do videoxogo.
Dirixida e producida por Sara Pérez Lantes e Juan Alberto Martínez López, a Atlantic Games Conference reforza nesta edición a súa vocación de conectar o talento galego co ecosistema estatal e internacional.
O evento preséntase como un espazo aberto no que creadores, programadores, artistas e público interesado poden compartir coñecemento, establecer contactos profesionais e descubrir novas perspectivas da industria.
A programación inclúe:
- 10 charlas maxistrais
- 4 talleres prácticos
- Un podcast en directo
- Un concerto en vivo
A sección de charlas constitúe o eixo central do evento, cunha selección de profesionais que abordan o videoxogo desde múltiples disciplinas.
Entre os nomes confirmados destaca Pierre Corbinais, escritor e deseñador narrativo en títulos como Wednesdays, Haven ou Bury Me, My Love, que abrirá o programa cunha reflexión sobre a creación de experiencias que exploran emocións complexas.
A programación narrativa complétase con Victoria, fundadora da editorial Amor de nai, quen analizará a relación entre psicoloxía, horror e videoxogos como ferramentas de exploración persoal.
No ámbito do deseño, Eva Pérez (ex-Tequila Works) profundará nos sistemas de xogo, mentres que Luc Alvarado (Do Not Feed the Monkeys 2099, Friends vs Friends) abordará os desafíos da escalabilidade no desenvolvemento independente.
O compositor e desenvolvedor Aquiles T. M. ofrecerá unha visión persoal do proceso creativo, marcada pola aprendizaxe constante.
A arte técnica terá especial protagonismo con Harry Alisavakis (Okomotive), especialista en shaders e VFX, e Cristopher J. Mendoza (Denshattack!), que analizará o papel dos efectos visuais na identidade estética dos videoxogos. A eles súmase Adrián Dono, concept artist con experiencia en proxectos AAA internacionais.
No eido transversal da industria, Hernán Calvo explorará a música adaptativa, mentres que Lucía Herrero abordará as claves da comunicación e xestión de comunidades no contexto actual.
A programación práctica permitirá ás persoas asistentes profundar en distintas áreas do desenvolvemento:
- Maikel Ortega (The Game Kitchen) analizará a creación de bossfights
- Iago Álvarez Graña, localizador en títulos como Dark Souls III ou Horizon Zero Dawn, introducirá o testeo lingüístico
- Juno Menager proporá un enfoque creativo afastado da perfección inicial
- Monkeybark impartirá un taller sobre deseño e identidade visual de personaxes