Os tres concellos galegos acaban de estrear cadanseu paso de vaca permanente, que é coma un paso de cebra pero no canto de raias brancas ten as típicas manchas da pel da vaca.
Resulta evidente que entre os símbolos da identidade galega non figura precisamente a cebra. E por aí naceu a idea de poñer sobre o asfalto a pel do noso animal máis emblemático.
Un ano despois do éxito popular que obtivo o paso de vaca temporal da Coruña, tres concellos rurais, A Baña, Mazaricos e Santa Comba acaban de estrear cadanseu paso de vaca permanente, que representa o noso pasado e o noso presente e aspira a representar o noso futuro.
Os alcaldes das tres vilas participaron na inauguración do cuarto paso de vaca permanente, o da Casa Grande de Xanceda, lugar onde comezou esta iniciativa para reivindicar o rural na cidade.
Os pasos de vaca non pretenden substituír os pasos de peóns homologados.