- Estas bandeiras pretenden fortalecer a Galicia verde
O presidente do Goberno galego, Alberto Núñez Feijóo, avanzou este venres que a Xunta recoñecerá o esforzo dos concellos comprometidos coa paisaxe e o medio ambiente cun novo distintivo: a Bandeira Verde de Galicia. Un recoñecemento que pretende coidar e fortalecer a Galicia verde, recoñecendo o esforzo daqueles concellos que implanten boas prácticas e fomenten o compromiso dos seus veciños neste eido.
Durante o acto de presentación, Feijóo subliñou que estas bandeiras verdes concederanse anualmente pola Xunta a aqueles municipios que cumpran con criterios que xiran en torno a 5 eixos: a protección da paisaxe, o cambio climático e eficiencia enerxética, a mobilidade sustentable, a xestión responsable dos residuos e accións de educación e sensibilización ambiental.
“Estamos a falar dun distintivo que permitirá incentivar o coidado da contorna, a limpeza dos espazos públicos, a redución de emisións de CO2 ou un menor menor consumo enerxético […]», declarou Feijóo, destacando que, con esta iniciativa, Galicia volve ser pioneira.
Estratexia de cambio climático e aposta pola rehabilitación
Logo de salientar que en 2019 Galicia aprobou a Estratexia galega de cambio climático e enerxía 2050, a Estratexia galega de economía circular ata 2030, e que a Lei de residuos está en trámite parlamentario, o titular da Xunta fixo fincapé tamén na aposta pola rehabilitación de vivendas, a través de ferramentas como a nova Lei de Rehabilitación, o programa Rexurbe e as Áreas de Rehabilitación Integral.
Co obxectivo de apoiar ás entidades locais con actuacións que humanicen espazos públicos e promovan o reequilibrio territorial, a Xunta está a desenvolver o Plan Hurbe, executando entre 2010 e 2018, 200 actuacións ao seu abeiro, cun investimento de 133 millóns en 125 concellos.