“A Comisión aumentará inmediatamente en 50 millóns de euros a actual dotación de axuda humanitaria prevista para Gaza. Esto elevará o total a máis de 75 millóns de euros”, afirmou a presidenta da CE, Ursula von der Leyen, nun comunicado, tras falar co secretario xeral da ONU, António Guterres. A presidenta da CE engadiu que “a Comisión apoia o dereito de Israel a defenderse dos terroristas de Hamás, respectando plenamente o Dereito humanitario internacional”.
Von der Leyen visitou o venres Israel e transmitiu ás súas autoridades a plena solidariedade da Unión Europea tras os ataques do movemento islamita Hamás. “Sei que a resposta de Israel demostrará que é unha democracia”, dixo Von der Leyen nunha comparecencia ante os medios de comunicación xunto ao primeiro ministro israelí, Benjamín Netanyahu, na que non pronunciou que esa reacción debe facerse en liña co Dereito humanitario internacional.