A conferencia ‘Solidarios co pobo de Ucraína’ organizada este martes en París a iniciativa do Goberno francés logrou xuntar algo máis de 1.000 millóns de euros para financiar as necesidades básicas de Ucraína para sobrevivir o próximo inverno.
Ucraína estimou as súas necesidades inmediatas nuns 800 millóns de euros. Os seus aliados cumpriron as súas expectativas, como detalla Catherine Colonna, ministra francesa de Asuntos Exteriores: «415 millóns para enerxía, 25 para auga, 38 para alimentos, 17 para sanidade, 22 para transporte e 493, espero non facer as contas demasiado rápido, que aínda non están adxudicados. O total é algo máis de mil millóns de euros».
Un esforzo colectivo que o primeiro ministro ucraíno, presente na reunión, celebrou, asegurando que grazas aos países que seguen sendo os seus aliados nestes tempos escuros, Ucraína non caerá na «escuridade» este inverno.