Trátase dun evento cuxa programación combina festa gastronómica, unha charla, talleres infantís e tres showcookings de acceso gratuíto que se celebrarán no interior da lonxa, a diferenza da maioría de actividades, que terán lugar na carpa instalada no peirao.
Promo do evento.
Os showcookings estarán dirixidos por tres cociñeiros galegos de referencia. O venres 22 (19:00h) será a quenda de Miguel Mosteiro, impulsor de Gastrolab Arousa, que compaxina a cociña coa divulgación do produto galego en medios de comunicación e eventos nacionais e internacionais.
O sábado 23 (19:00h) a lonxa acollerá a mostra de cociña de José Manuel Mallón, cociñeiro e formador vinculado á promoción do produto local como embaixador das Experiencias de Calidade de Agacal. A súa cociña logrou recoñecemento máis aló de Galicia: en 2024 foi distinguido no congreso San Sebastián Gastronómika como gañador do I Campionato de Sopas de Peixe.
O domingo 24 (12:00h), Iván Domínguez será o encargado de pechar este ciclo de showcookings. Tras o seu paso por restaurantes de prestixio como Casa Marcelo ou Alborada, Domínguez lidera hoxe o seu proxecto Nado, onde desenvolve unha filosofía culinaria que concibe as elaboracións “de principio a fin” e sempre centradas no produto autóctono e de tempada.
Cada showcooking permitirá aos asistentes ver en directo a preparación de diferentes receitas e degustalas. A participación é gratuíta, pero require inscrición previa no teléfono 981 746 951, coa limitación de inscrición a un único showcooking por persoa para facilitar o acceso ao maior número posible de interesados.
Polbo e longueirón, protagonistas na carpa gastronómica
O eixo da cita volverá estar no polbo, que poderá probarse en catro elaboracións —á feira, á brasa, en croquetas e en empanada—, xunto co longueirón á prancha, outro dos produtos máis representativos da lonxa de Corcubión. A carpa gastronómica abrirá o venres de 20.00 a 23:30h, o sábado de 13.00 a 17:00h e de 20.00 a 23:30h, e o domingo de 13.00 a 17:00h.
Talleres infantís de ciencia mariña e voces das mariscadoras
A programación complétase con actividades de divulgación e sensibilización. Os máis pequenos poderán participar nos talleres de ciencia mariña dirixidos por Arenaria Coordinación, “Como son vos cefalópodos por dentro? “ (sábado ás 12:00h) e “E ti.., de quen ves sendo?” (sábado ás 19:30h), ambos con inscrición previa no 981 746 951.
Ademais, o sábado ás 12:30h a lonxa acollerá a charla “Abrandases do mar: voces e retos do marisqueo”, na que varias mariscadoras da Confraría compartirán a súa experiencia e reflexións sobre a conciliación familiar, a igualdade e os desafíos da muller no sector pesqueiro.
Con esta combinación de showcookings, degustacións, talleres para familias e espazos de debate, as Xornadas Gastronómicas de Corcubión buscan poñer en valor a riqueza dos seus recursos pesqueiros, recoñecer o traballo do sector e achegar a cultura mariñeira ao público de todas as idades.