O Concello completou os derradeiros traballos na nova glorieta intelixente da Casa do Mar, operativa para o tráfico de vehículos desde comezos de maio. Púxose así o punto e final ás intervencións previstas na rotonda, coa instalación no illote central da antiga áncora da coiraza do Orzán, restaurada polo servizo municipal de Infraestruturas.
Segundo os rexistros municipais, a áncora foi recollida nas redes dun buque coruñés que faenaba nas augas do Gran Sol, e adquirida posteriormente polo Concello na lonxa dos peiraos de Linares Rivas. A peza, de dúas toneladas e media e que, baseándose nas estimacións do persoal técnico municipal, podería ter máis de cen anos, restaurouse entón nos talleres municipais de Agrela e, xa no ano 2000, foi situada na coiraza do Orzán, de onde foi retirada no ano 2013.
O Concello recupera agora a áncora para o seu uso como elemento ornamental na rotonda que tamén dá acceso ao porto. Nas últimas semanas, a peza foi sometida a tarefas de saneamento, coa eliminación de vultos na súa superficie e o estendido dunha pintura antioxidante, para evitar a súa deterioración fronte ás inclemencias meteorolóxicas. A áncora repousa no illote central da glorieta sobre un gran bloque de granito, que tamén foi recuperado.