- A Feira Internacional de Turismo terá lugar en Madrid do 22 ao 26 de xaneiro.
O Gran Fondo Ézaro ou a candidatura da Costa da Morte a Reserva Mundial de Surf son algúns dos programas que a Deputación da Coruña promocionará na Feira Internacional de Turismo (FITUR) que se desenvolve en Madrid desde o mércores 22 até o domingo 26 de xaneiro.
Conducido polo xornalista deportivo Tedio Carrera e coa presenza de recoñecidas figuras do mundo do deporte e o espectáculo desenvolverase este mércores a presentación en Fitur da etapa da Vuelta a España que este ano transcorrerá de Muros ao Ézaro ademais dunha nova edición do Gran Fondo. O vicepresidente e deputado de Turismo da Deputación da Coruña, Xosé Regueira, e o tamén deputado e alcalde de Dumbría, José Manuel Pequeño Castro ademais de representantes dos concellos polos que atravesa a carreira e de membros da organización participarán nun acto en que se proxectarán dous vídeos que dan conta da impresionante paisaxe e riqueza monumental do traxecto e da tradición ciclista da que dá mostra o Gran Fondo Ézaro.
Ademais o espazo de Turespaña acollerá a presentación da 30 edición da Mostra do Encaixe de Camariñas o 25 Asalto ao Castelo de Vimianzo e alí tamén se dará a coñecer o Parador de Turismo de Muxía que está previsto que entre en servizo nos próximos meses.