O pleno da Deputación da Coruña aprobou este mércores por unanimidade de todos os grupos políticos unha declaración institucional na que manifesta a súa oposición á planta de biogás proxectada pola empresa Aratel no lugar de Vista Alegre, na parroquia de Soandres, no concello da Laracha.
A corporación provincial considera que o proxecto provocaría impactos significativos sobre o medio ambiente, os recursos hídricos e a calidade de vida da veciñanza, polo que resulta incompatible coa protección do territorio e co modelo de desenvolvemento sostible que defende a institución.
A declaración sinala que, aínda que o biogás e o biometano poden constituír unha oportunidade para a xestión de residuos e a produción de enerxía renovable cando se trata de instalacións ben planificadas e dimensionadas, os proxectos de grande escala con finalidade exclusivamente comercial comportan riscos relevantes que deben ser avaliados con rigor.
Entre as características do proxecto que xeran maior preocupación, a Deputación destaca a ocupación de máis de 95.000 metros cadrados de solo rústico nas proximidades do río Anllóns, o tratamento previsto de 65.000 toneladas anuais de residuos, incluíndo subprodutos animais de categoría 2, ou a xeración de máis de 30.000 toneladas anuais de efluentes líquidos e preto de 20.000 toneladas de residuos sólidos sen tratamento específico.
A isto súmanse o consumo estimado de 1,5 millóns de litros de auga ao ano, a circulación diaria de camións polas vías locais e a proximidade das instalacións a núcleos de poboación, con impactos acreditados en termos de ruído e cheiros.
A Deputación pon tamén o foco na escasa repercusión económica do proxecto, que prevé un máximo de dez empregos directos, e na ausencia dunha normativa específica en Galicia que regule a implantación e funcionamento deste tipo de instalacións, o que xera inseguridade xurídica e ambiental.
Neste contexto, o pleno acordou instar a Xunta de Galicia a non declarar o proxecto de interese estratéxico nin aplicarlle mecanismos de aceleración administrativa mentres persistan as dúbidas sobre o seu impacto e a súa localización.
A corporación provincial reclámalle tamén á Xunta a elaboración urxente dunha normativa específica que regule a implantación e funcionamento das plantas de biogás en Galicia e que estableza garantías claras para a protección do territorio e da cidadanía.
A Deputación expresa ademais o seu apoio á veciñanza da Laracha e da contorna, que manifestou a súa preocupación polos posibles efectos negativos do proxecto sobre a calidade da auga, do aire e do entorno, así como pola desvalorización das propiedades e o impacto na vida diaria.
Asistiron ao pleno varios veciños da Laracha
O alcalde, José Manuel López Varela, e os concelleiros José Ramón Martínez, Patricia Bello e Pablo Cambón, asistiron, acompañados pola veciñanza de Soandres, ao Pleno da Deputación da Coruña no que foi lida a Declaración institucional na que se manifesta a oposición ao proxecto de planta de biogás de Vista Alegre.
Veciños e veciñas de Soandres, xunto co alcalde da Laracha e varios concelleiros/as, asistiron ao pleno celebrado este mércores na Deputación da Coruña.
DECLARACIÓN INSTITUCIONAL ASINADA POR TODOS OS GRUPOS POLÍTICOS
PLANTA DE BIOGÁS PROXECTADA NO CONCELLO DE A LARACHA
O biogás e o biometano son fontes de enerxía renovábel obtidas a partir da descomposición de materia orgánica, como xurros gandeiros, esterco, residuos agrícolas ou restos da industria alimentaria. Ben planificadas e axeitadamente dimensionadas, estas instalacións poden representar unha oportunidade para a xestión de residuos e a produción de enerxía local. Non obstante, os proxectos de grande escala con finalidade exclusivamente comercial presentan riscos relevantes para o medio ambiente, para a saúde das persoas e para a calidade de vida das comunidades afectadas.
A empresa Aratel pretende implantar unha macroplanta de produción de biogás no lugar de Vista Alegre, na parroquia de Soandres, no concello da Laracha, con características que esta Corporación considera incompatibles coa protección do territorio, dos recursos hídricos e do benestar da veciñanza:
– A planta ocuparía máis de 95.070 m² de solo rústico nas proximidades do río Anllóns.
– Prevése o tratamento de 65.000 toneladas anuais de residuos, incluindo subprodutos animais clasificados como SANDACH de categoría 2.
– O proxecto contempla a circulación de 13 camións diarios polas vías locais.
– Estímase un consumo anual de 1,5 millóns de litros de auga, extraídos do principal regato que conforma o río Anllóns.
– Xerará máis de 30.000 toneladas anuais de efluentes líquidos e preto de 20.000 toneladas de dixestato sólido sen tratamento específico.
– As instalacións situaríanse a menos de 300 metros de núcleos de poboación, cun impacto acreditado en termos de ruído e cheiros.
– O proxecto prevé unicamente un máximo de 10 empregos directos, polo que o beneficio económico para a comarca é mínimo en relación ao seu impacto.
A estas características engádese a ausencia dunha normativa específica en Galiza que regule a implantación e o funcionamento das plantas de biogás e o réxime xurídico do dixestato producido, o que xera inseguridade xurídica e ambiental para as comunidades afectadas.
A veciñanza da Laracha e da contorna expresou publicamente a súa preocupación pola desvalorización das propiedades, o impacto nos recursos hídricos e na calidade do aire, a incerteza sobre o destino das augas residuais e a posibilidade de que este proxecto abra a porta a futuras macroinfraestructuras similares na comarca.
Por todo isto, as deputadas e deputados da corporación acordamos
Primeiro.
Manifestar a oposición ao proxecto de planta de biogás promovido pola empresa Aratel no lugar de Vista Alegre, parroquia de Soandres, no concello da Laracha, na súa configuración actual, polas graves afectacións ambientais, paisaxísticas, hídricas e sociais que presenta.
Segundo.
Instar á Xunta de Galiza a non declarar o proxecto de interese estratéxico nin aplicarlle ningunha figura de aceleración de trámites, en tanto subsistan as dúbidas sobre a súa localización, o seu impacto ambiental e o modelo de negocio que o sustenta.
Terceiro.
Instar á Xunta de Galiza á elaboración inmediata dunha normativa reguladora da implantación e funcionamento das plantas de biogás en Galiza, en líña co lexislado por outras comunidades autónomas, e a que, mentres esa normativa non entre en vigor, que se estuden as posibilidades legais para a posíbel suspensión da tramitación adminitrativa.
Cuarto.
Mostrar o apoio desta Corporación Provincial á veciñanza de A Laracha e reiterar o compromiso da Deputación da Coruña coa protección do territorio rural, dos recursos naturais e da calidade de vida das persoas que habitan os concellos da provincia.
Quinto.
Trasladar esta Declaración Institucional ao Goberno da Xunta de Galiza, ao Parlamento de Galiza, ao Concello de A Laracha e ás asociacións veciñais afectadas polo proxecto.