A Deputación da Coruña abre a convocatoria de axudas do PEL 2021, con máis de 5 millóns de euros para financiar novas contratacións, investimentos que melloren a competitividade das empresas e cotas á Seguridade Social de persoas autónomas. Este ano, todas as liñas do PEL serán compatibles entre si, polo que os beneficiarios poderán optar a axudas de entre 2.500 e 46.300 euros.
O presidente da Deputación da Coruña, Valentín González Formoso, o vicepresidente Xosé Regueira e o deputado responsable da área de Emprego, José Ramón Rioboo, presentaron a nova convocatoria de axudas do Plan de Emprego Local (PEL-2021), que este ano conta cun orzamento de máis de 5 millóns de euros para apoiar a contratación de persoal e investimentos por parte dos autónomos, pemes e microempresas da provincia. O prazo de solicitudes das axudas xa está aberto e remata o 15 de abril.
Atendendo ás demandas da cidadanía e coa finalidade de facilitar a tramitación da solicitude das axudas e de resolver a súa concesión o máis axiña posible redúcese notablemente a documentación a presentar polos solicitantes, que no momento de solicitude so deberán presentar o Anexo de xestión empresarial sostible, e ademais suprímense das exclusións ás sociedades civís, de maneira que estas poderán ser beneficiarias das axudas PEL na presente convocatoria.