A Deputación da Coruña investirá este ano case 8 millóns de euros no Plan de Conservación de Vías Provinciais. O plan vén de saír a licitación pública na Plataforma de Contratación do Estado.
«O programa contempla a execución de traballos de mantemento, reparación do firme e pavimentación nos máis de 2.100 quilómetros de estradas cos que conta a rede viaria da Deputación. Todas estas actuacións están destinadas a mellorar as condicións de circulación, aumentar a seguridade viaria e reducir a siniestralidade nas estradas da provincia», explicou o deputado titular da área de Vías Provinciais, José Manuel Pequeño.
A maior parte dos investimentos destinaranse á renovación de firmes e capas de rodadura (55%) e renovación da sinalización vertical e horizontal (20,5%), mentres que a apertura e limpeza de cunetas suporá preto do 8% dos investimentos e a instalación de defensas viais u obras de drenaxe, un 6% cada unha, respectivamente.
Na Costa da Morte a conservación das vías provinciais ascende a algo máis de 1 millón de euros repartidos do seguinte xeito:
| CARBALLO,CERCEDA E A LARACHA | 390.293,62 euros |
| CABANA,MALPICA E PONTECESO | 351.500,95 euros |
| CAMARIÑAS, LAXE, MUXÍA E VIMIANZO | 154.949,50 euros |
| CEE, CORCUBIÓN, DUMBRÍA E MAZARICOS | 161.523,20 euros |