A situación derivada do Covid19, que mantén á poboación nos seus domicilios, obrigou á Deputación da Coruña a suspender os 65 cursos presenciais do Plan de Formación Agrupado 2020 previstos para o segundo trimestre do ano.
Para asegurar, dentro do posible, o dereito a formarse dos traballadores e traballadoras das 101 entidades locais que partipan no plan e non prexudicar as empresas do sector, a sección de Formación decidiu adiantar a primeiros de abril o inicio da maioría de cursos en liña previstos para o período abril-xuño e abrir, de forma urxente, unha convocatoria extraordinaria con varios cursos en liña que estaban previstos para o último cuatrimestre do ano. O prazo de inscrición para estes cursos xa está aberto e finalizará o 3 de abril.