A Axencia Europea do Medicamento (EMA) apoiou este luns o uso da vacina estadounidense Novavax por ser segura e eficaz, polo que recomendou autorizar a súa licenza, converténdose na quinta vacina en superar o filtro científico europeo nesta pandemia. Queda en mans da Comisión Europea dar a autorización final para a súa comercialización. Esta vacina recoméndase para adultos maiores de 18 anos, debe administrarse en dúas doses, con 21 días de diferenza, e pode ser almacenada, manipulada e distribuída a temperatura de frigorífico.
O comité de medicamentos humanos (CHMP), que se reuniu este luns nun encontro extraordinario para concluír a súa avaliación da vacina de Novavax, apoiou por consenso que os datos son “sólidos e cumprían os criterios da UE en canto a eficacia, seguridade e calidade”. É a primeira vacina baseada en proteínas que a EMA recomenda contra a covid-19 e “apoiará as campañas de vacinación nos Estados membros da Unión Europea (UE) durante unha fase crucial da pandemia”, engade a axencia.