A esencia da Costa da Morte triunfa en FITUR


En FITUR hai que estar. Con máis apaixonados que detractores, a Feira Internacional do Turismo volve a converterse estes días nun dos eventos máis importantes do noso país e do mundo.

Este mércores inaugurouse a 42ª edición, á que acudiron os Reis de España, e este xoves houbo unha forte presencia galega coa presentación de diversas campañas turísticas e culturais. Desde a provincia da Coruña acudiron ao IFEMA MADRID varios alcaldes e alcaldesas de municipios da Costa da Morte como Vimianzo, Camariñas, Muxía e Cee.

VIMIANZO

A rexedora, Mónica Rodríguez, foi a encargada de presentar a campaña ‘Vimianzo a pé. A pé de ti’, coa que se pretende poñer en valor o potencial de todas as parroquias a través de rutas de senderismo para realizar camiñando.

«O que vimos presentar hoxe aquí é a rúbrica dun extenso e pormenorizado traballo de moitos meses, de investigación, de preservación e de posta de moitos lugares senlleiros do noso municipio» subliñaba a alcaldesa ao comezo da súa intervención tras agradecer á ministra de Turismo, Reyes Maroto, e ao secretario de Estado de Turismo, Fernando Valdés, por permitir aos pequenos municipios acudir á feira e mostrar toda a súa competitividade.

No vídeo de presentación o público puido desfrutar de imaxes de diferentes igrexas, do Vieiro Fidalgo e do Encoro da Fervenza, dos dolmens, da Ruta dos Petróglifos, do coído de Sabadelle, da ruta dos Muíños e de moitos outros lugares que se poden visitar andando e coa axuda das xeolocalización realizadas polo departamento de Turismo.

Mención especial, como non podía ser doutra forma, ao Asalto ao Castelo que este ano celebrará a súa 25ª edición. Rodríguez lembrou que «xa hai dous anos que presentamos neste mesmo escenario a vixésimo quinta edición dun Asalto moi especial e da que nos privou a COVID-19, pero que agardamos poder conmemorar este 2022».

Presentación ‘Vimianzo a pé. A pé de ti’

CAMARIÑAS

Camariñas encaixou perfectamente en FITUR. Unha boa calidade de imaxe e unha emocionante banda sonora foron os ingredientes de ‘E ti, encaixas no paraíso?’, unha presentación audiovisual cuxa previa correu a cargo da rexedora, Sandra Ínsua, quen convidou a todo o mundo á 31ª edición da Mostra do Encaixe, un dos maiores eventos culturais da Costa da Morte que se celebrará do 13 ao 17 de abril. A iniciativa busca dar a coñecer Camariñas pola súa riqueza e patrimonio máis alá da artesanía. Así, o espectador comezou un percorrido desde a ermita da Virxe do Monte ata a duna rampante do Monte Branco, imaxe do cartel promocional da Mostra.

Todas as parroquias e lugares emblemáticos do municipio están representados nesta peza audiovisual: o porto de Camariñas e as súas praias onde traballan as mariscadoras, os percebeiros de Santa Mariña, o espazo natural do Ariño, a desembocadura do río Grande, a Ponte do Porto, Camelle, o Museo e a casa de Man, Arou, a igrexa e o pobo de Xaviña, a igrexa de San Xurxo, o Faro Vilán, as praias de Reira, o cemiterio dos Ingleses e a praia de Trece coa súa duna rampante.

«Camariñas está feita de encaixe, iso é indubidable. A nosa forma de ser, os nosos costumes e as nosas tradicións están tecidos con mimo polas mans das nosas amadas palilleiras», explicou a rexedora, quen invita a todo o mundo a que visite a localidade porque se o fai unha vez, repite.

Spot promocional da Mostra do Encaixe 2022

Pantallas no centro de Madrid

Para contribuír á difusión da XXXI Mostra do Encaixe, o Concello de Camariñas, ao igual que xa fixera no ano 2020, decidiu levar o evento ao centro de Madrid. Así, do 17 ao 23 de xaneiro proxéctase nas grandes pantallas dixitais de Callao, en Gran Vía, un cartel promocional.

Cartel promocional da Mostra en Madrid

MUXÍA

A vila da Barca foi outro dos municipios da Costa da Morte con representación en FITUR e cunha presencia totalmente sensorial. ‘Muxía, un municipio de sensasións’ é unha novidosa iniciativa que, a través dun código QR, permite ao usuario escoitar sons característicos da localidade como a chegada dun barco pesqueiro, o vento do nordés, as ondas do mar, a música dunha tradicional danza como a das Espadas de Quintáns ou un berro durante a romaría da Barca dun dos veciños máis apaixonados desta festividade.

O alcalde, Iago Toba, destacou na súa intervencións que estes sons «sen dúbida son un fiel reflexo do que somos, xente de mar e con moito corazón e sentimento».

A aplicación foi todo un éxito, segundo afirman desde a Alcaldía, xa que tres horas despois da súa presentación oficial xa contaba con «centos de descargas e interaccións», e mesmo a ministra de Turismo e o secretario de Estado de Turismo tamén desfrutaron das ‘sensasións’ muxiás nos seus móbiles.

A ministra de Turismo, Reyes Maroto, xunto ao alcalde de Muxía, Iago Toba_Concello

CEE

O Concello de Cee tamén estivo presente na feira de turismo para promocionar o Ano Xubilar da Virxe da Xunqueira, que comezará o 1 de maio. A alcaldesa, Margarita Lamela, e o párroco ceense, Desiré Kouakou, foron os encargados de dar a coñecer o vídeo promocional do Ano Xubilar, que foi elaborado pola parroquia xunto coa Asociación de Amigos da Xunqueira.