A Deputación da Coruña vén de sacar a licitación, cun orzamento de 282.525,18 euros, as obras de renovación do firme da estrada DP1904 de Berdillo a Moucho, no termo municipal de Carballo.
A actuación prevista estenderase entre os puntos quilométricos 0+000 e 2+450 e comezará coa limpeza de arcéns, cunetas e taxeas en ambas marxes e o fresado e reparación das zonas que presentan gretas ou fochancas cun tratamento superficial.
Posteriormente procederase á pavimentación de todo o tramo con mestura asfáltica en quente de 6 cm de espesor en todo o ancho da calzada, o recrecido dos sumidoiros e a renovación da sinalización horizontal e vertical.
O prazo de execución será de catro meses a partir do inicio das obras.