Ambos os dous feridos, un matrimonio de 82 e 84 anos, foron trasladados ao Complexo Hospitalario da Coruña (CHUAC) debido ás lesións provocadas pola auga quente. Cando chegaron os equipos de emerxencias, atoparon as persoas completamente molladas e cubertas de borra.
Segundo explicaron os bombeiros a través do 112 Galicia, os danos producíronse pola explosión dunha caldeira no interior dun domicilio situado na Travesía de Oseiro, en Arteixo. Ademais das lesións que isto causou aos ocupantes da vivenda, rexistráronse danos materiais, pois derrubouse un tabique que dividía a cociña dun comedor e rompeu unha xanela.
Sobre este suceso, recibíronse avisos no 112. As principais comunicacións chegaron a través dos Bombeiros de Arteixo, que xa ían en camiño, e dos profesionais de Urxencias Sanitarias de Galicia-061 coas súas dotacións preparadas.
Completaron o operativo os efectivos do Servizo Municipal de Protección Civil e os axentes da Policía Local e da Garda Civil.