A Fiscalía de Valencia abriu de oficio unha investigación para determinar se os insultos racistas proferidos a Vinicius constitúen un delito de odio. Segundo explicou a fiscal delegada de delitos de odio da Fiscalía Provincial de Valencia, Susana Gisbert, esta decisión adoptouse ao ter coñecemento do sucedido no estadio de Mestalla e por decisión do Ministerio Público (de oficio), que de momento non tramita ningunha denuncia por estes mesmos feitos. O trámite agora, engadiu, consistirá en solicitar información sobre o sucedido a partir de todas as fontes dispoñibles, incluídos vídeos publicados en redes sociais, posible información policial e mesmo a acta arbitral do encontro, entre outras. A investigación fiscal abordará tanto o sucedido antes do encontro e durante o recibimento aos xogadores na avenida de Suecia, como no transcurso do partido, sinalaron desde a sección de delitos de odio.
0