- Hai dúas persoas de nacionalidade ecuatoriana detidas e búscase a unha terceira
A Garda Civil, a Policía Nacional e a Axencia Tributaria xa reflotaron o submarino interceptado o pasado sábado a escasas millas da praia de Hío, na comarca do Morrazo (Pontevedra).
Os axentes requisaron un total de 152 fardos que contiñan 3.000 quilos de cocaína de gran pureza.
Trátase do primeiro “narcosubmarino” detectado no continente europeo. Na operación foron detidas dúas persoas -de nacionalidade ecuatoriana- e hai unha terceira fuxida cuxo paradoiro aínda se descoñece.
As investigacións comezaron cando o Centro de Análise e Operacións Marítimas en materia de Narcotráfico (MAOC) alertou ao Centro de Intelixencia contra o Terrorismo e o Crime Organizado (CITCO), sobre unha embarcación sospeitosa que se dirixiría a España polo Atlántico cargada de cocaína. Nesta primeira fase, a colaboración cos corpos policiais de Reino Unido foi fundamental para a posterior interceptación do submarino. Na operación tamén participaron policías de Portugal, Estados Unidos e Brasil.
Desde ese momento despregouse un dispositivo de detección e localización con medios aeronavais da Coruña e Pontevedra, e reforzouse a presenza policial en toda a zona de costa.