- A vítima denunciou a subtracción dunha bicicleta valorada en máis de 1.000 euros
O Equipo Territorial da Policía Xudicial da Garda Civil de Ferrol investigou a tres individuos como presuntos autores dun delito de furto.
Os feitos ocorreron por mor da denuncia interposta pola vítima nas dependencias oficiais do Posto da Garda Civil de Valdoviño o 19 de xuño de 2018, onde se comunicaba a subtracción dunha bicicleta valorada en máis de 1.000 euros e que se localizaba nun anexo á súa vivenda na mencionada localidade.
Durante a investigación, os axentes da Garda Civil localizaron a bicicleta subtraída anunciada nunha páxina de compravenda da internet. Despois de identificar ao responsable do anuncio, procederon á recuperación do material furtado.
Por agora hai tres persoas relacionadas cos feitos que están a ser investigadas como presuntos autores dun delito de furto, e que ademais xa están ao dispor do Xulgado de Instrución de garda de Ferrol.