A operación Falcone permitiu deter a dez persoas, sete das cales ingresaron en prisión, e desmantelar unha rede dedicada ao tráfico de estupefacientes que era abastecida por dúas persoas asentadas en Cambados. A organización utilizaba drons para distribuír doses de droga entre os consumidores. A investigación iniciouse tras detectarse un incremento da criminalidade na zona e localizar varios puntos de venda de substancias estupefacientes.
As actuacións de Equipo de Policía Xudicial da Garda Civil de Noia permitiron identificar os integrantes da rede e determinar que a subministración de cocaína procedía de dúas persoas residentes en Cambados que abastecían periodicamente os vendedores de Noia. A rede utilizaba drons para realizar entregas de doses de droga a consumidores, un método co que os investigados pretendían dificultar a detección da súa actividade por parte das Forzas e Corpos de Seguridade.
A operación desenvolveuse en dúas fases. Na primeira, a Garda Civil detivo tres persoas no marco dunha actuación relacionada co transporte de droga desde Cambados ata Noia. Interviñeron aproximadamente 200 gramos de cocaína e 1.900 euros en efectivo. Dous días despois levouse a cabo a segunda fase, que concluíu coa detención doutras sete persoas e a realización de tres rexistros domiciliarios en Noia. Neles incautáronse de diversas substancias estupefacientes, entre elas cocaína, marihuana e haxix, alén de material destinado á manipulación e distribución da droga e numerosos dispositivos electrónicos.
A investigación estivo dirixida polo Tribunal de Instancia de Noia, que decretou o ingreso en prisión provisional de sete dos dez detidos.