A Patrulla do Servizo de Protección da Natureza da Garda Civil de Corcubión, incautou 122 quilos de polbo no porto de Fisterra. Os feitos ocorreron cando efectivos da mencionada Unidade que se atopaban realizando labores de vixilancia na zona, detectaron a descarga de capturas desde un barco pesqueiro a unha furgoneta na mencionada instalación.
A Garda Civil desprazouse ás instalacións e inspeccionou o vehículo, verificando que transportaba 4 caixas de plástico, transvasadas do barco, con polbo no seu interior. A forza actuante solicitou ao patrón do buque a documentación pertinente, constatando que carecía do permiso de descarga na devandita instalación e que as capturas non foran descargadas en lonxa para que non contabilizasen na cota semanal legalmente establecido.
A Garda Civil procedeu á incautación da mercadoría, a cal unha vez pesada arroxou un total de 122 quilogramos, e á confección das correspondentes denuncias por supostas infraccións á Lei de Pesca de Galicia.
A mercadoría aprehendida foi entregada posteriormente, en presenza do patrón da embarcación, no centro benéfico de Caritas da localidade de Cee.