Este luns presentouse na Laracha a exhibición solidaria de medios da Guardia Civil, que terá lugar o luns 21 de outubro no CEIP Otero Pedrayo. O acto contou coa participación do alcalde, D. José Manuel López Varela; a concelleira de Ensino, Dna. Patricia Bello; o tenente coronel D. Julio González Chas, responsable do Plan Director da Comandancia; e o cabo 1º D. Sergio García Vázquez, formador do Plan Director da Compañía de Carballo.
O obxectivo desta iniciativa é achegar o labor da Guardia Civil á poboación, especialmente aos máis novos, para que coñezan de preto o funcionamento das distintas unidades e o importante labor que desenvolven ao servizo da sociedade. Ademais, a exhibición terá un carácter solidario, xa que se solicitará ás persoas asistentes achegar alimentos non perecedoiros que serán doados a Cáritas da Laracha.
O evento do día 21 celebrarase en dobre horario: pola mañá, de 10:00 a 14:00 horas, será destinado exclusivamente aos escolares e, pola tarde, de 16:00 a 18:00 horas, abrirase a toda a cidadanía.
Entre as principais atraccións da exhibición destacan as demostracións do Servicio Cinológico y Remonta (SECIR), co seu espectacular traballo cos cans adestrados na busca de persoas, explosivos e drogas, así como a presenza do helicóptero da UHEL (Unidad de Helicópteros), que será desprazado ata A Laracha para a ocasión.
Tamén participarán estas unidades da Guardia Civil, con persoal, equipamento e vehículos:
- GEDEX (Grupo de Especialistas en Desactivación de Artefactos Explosivos).
- USECIC (Unidad de Seguridad Ciudadana de Comandancia).
- UOPJ (Unidad Orgánica de Policía Judicial).
- SEPRONA (Servicio de Protección de la Naturaleza).
- PAFIF (Patrulla Fiscal y de Fronteras).
- Equipo PEGASO (Policía especialista en gestión aeronáutica y seguridad operacional).
- Seguridad Ciudadana.
- OMAP (Oficina Móvil de Atención al Peregrino).
- GEAS (Grupo de Especialistas en Actividades Subacuáticas).
- ERIM (Equipo de Rescate e Intervención en Montaña).
- Subsector de Tráfico.
A cita promete ser unha xornada inesquecible para o alumnado, que poderá interactuar co persoal e coñecer de primeira man o funcionamento das distintas unidades. Tamén será unha oportunidade única para que toda a veciñanza da Laracha poida asistir e desfrutar dunha exhibición de medios espectacular.
O Concello anima a todas as persoas a participar pola tarde, achegarse ao recinto escolar e colaborar coa recollida de alimentos, contribuíndo así tanto á causa solidaria en beneficio de Cáritas da Laracha como a reforzar o vínculo de proximidade entre a Guardia Civil e a cidadanía.