Membros da Plataforma de Turismo e Hostalería da Costa da Morte vertebraron a comarca e concentráronse este domingo con destino a Carballo para protestar «por necesidade» por un Plan de rescate xusto, cun apoio financeiro directo ao sector por parte das diferentes administracións. Ao aparcamento do Rego da Balsa chegaron medio cento de turismos, de Fisterra, Muxía ou Camariñas, acompañados da Garda Civil de Tráfico de Corcubión. Acto seguido, sumando participantes, dirixíronse a pé á Praza dos Bombeiros Voluntarios, no barrio da Milagrosa, onde leron un comunicado e reivindicaron as súas propostas e dereitos. Alí quixeron deixar claro que os seus negocios «non son o problema» da pandemia, ao contrario, pretenden ser parte da solución. A participación podería ser maior, nunhas reivindicacións que afectan directamente a centenares de negocios do sector, e indirectamente a moitos máis.