- A cita é este venres, a partir das 16:00 horas, no Centro Comunitario de Caión. Asistirá a titular de Mar, Rosa Quintana
O Centro Comunitario de Caión, na Laracha, acolle este venres pola tarde a presentación de resultados do proxecto europeo Pasaporte REMA, financiado polo Fondo Marítimo de Pesca (FEMP) e promovido polos Grupos de Acción Local do Sector Pesqueiro (GALP), cuxo obxectivo é desenvolver unha actividade turística creativa e adaptada á nova realidade, buscando un intercambio cultural entre as diferentes zonas costeiras do Atlántico.
A cita arrancará ás 16:00 horas e contará coa conselleira do Mar, Rosa Quintana, que ademais será a encargada de entregar cestas con produtos do mar sorteadas entre os máis de 100 participantes dunha iniciativa que pretendía atraer visitantes aos museos da Rede REMA. De feito, este venres en Caión haberá un recoñecemento especial para os museos dos diferentes Grupos de Acción Local do Sector Pesqueiro (GALP) galegos.
Entre outras actividades desenvolvidas pola Rede destaca o lanzamento de guía Espacios Museísticos Pasaporte REMA e a posta en marcha dunha competición para escolares, baseada nunha escape room virtual, na que participaron máis de 500 alumnos de 41 colexios galegos.
A esta xornada asistirán a presidenta da Rede REMA e alcaldesa de Muros, Inés Monteagudo; o presidente do GALP Costa da Morte, Evaristo Lareo; o alcalde da Laracha, José Manuel López; e o director dos Museos de Ponferrada, que impartirá a charla Buenas prácticas del trabajo en red. Como colofón final o artista Ramón Trigo realizará un mural para o centro comunitario larachés.