- O servizo, valorado nun total de 661.000 euros, inclúe por primeira vez a limpeza das praias de Caión
O alcalde da Laracha, José Manuel López Varela, e a directora do centro especial de emprego Aspaber, Dolores Fernández, formalizaron este martes o novo contrato do servizo de limpeza viaria no municipio. Valorado nun total de 661.000 euros máis IVE, este servizo prestarase durante catro anos prorrogables por outros dous máis.
A entidade xa leva anos desenvolvendo estas actuacións que, por primeira vez, incluirán a limpeza das praias de Caión. Nas condicións tamén se contempla o varrido manual nos núcleos urbanos (frecuencia diaria) e rurais, baldeo mecánico, eliminación de herbas no borde da calzada e nas beirarrúas, mantemento de papeleiras e intervencións especiais en momentos puntuais do ano como as festas populares ou a feira en Paiosaco.