- A participación estará limitada a centros especiais de emprego e empresas de inserción laboral de persoas con diversidade funcional
O Concello da Laracha sacará á licitación nos próximos días os novos contratos de xestión do punto limpo e do servizo de limpeza viaria por un período de catro anos (dous prorrogables por outros dous máis), e un valor estimado de 943.799,62 euros máis IVE.
Os pregos que rexerán o procedemento serán publicados na Plataforma de Contratación do Sector Público e nese momento abrirase o prazo para a presentación de ofertas, estando a participación limitada a centros especiais de emprego e empresas de inserción laboral de persoas con diversidade funcional. Co propósito de incrementar a competencia e facilitar a participación das pequenas e medianas empresas, a contratación estará dividida en dous lotes diferenciados.
Así, o lote 1 será o referido ao servizo de limpeza viaria e da praia de Caión, que alcanzará un importe de 660.882,52 euros máis IVE e incluirá o varrido manual diario nos núcleos urbanos e rurais; a eliminación de herbas no borde da calzada ou o mantemento de papeleiras.
O lote 2, valorado en 282.917,10 euros máis IVE, inclúe a xestión das instalacións do punto limpo, o servizo de recollida de voluminosos a domicilio ou a xestión dos novos colectores de aceite de uso doméstico que serán implantados polo Concello.
En ambos casos as empresas que resulten concesionarias estarán obrigadas a subrogar o persoal actualmente adscrito a eses servizos.