Continuando co plan de mellora e mantemento da rede viaria municipal, o Concello da Laracha ten actualmente en fase de execución dous proxectos que inclúen unha serie de intervencións que afectan a estradas localizadas en núcleos de varias parroquias, sendo tres delas en Erboedo.
Este martes realizouse a pavimentación da vía do lugar de O Vilar, onde tamén foi mellorada a rede de recollida de pluviais. A ese lugar acudiron o alcalde, José Manuel López Varela, e o concelleiro de Urbanismo e Obras Públicas, Jesús Souto, para comprobar o resultado dos traballos.
A continuación realizaranse actuacións tamén de mellora da superficie de rodadura en Cendón, da mesma parroquia, así como en O Toural e Longra pertencentes a Coiro.
Paralelamente, outro punto de actuación en Erboedo que está en execución é a estrada de Vilarmaior, onde a ampliación da plataforma da calzada implica a construción dunha escollera dunha lonxitude superior aos sesenta metros.
Todas estas intervencións forman parte dos proxectos que tamén incluíron a mellora da rede viaria na estrada entre Requende e A Calvela (Golmar), en A Porta Santa (Lestón) e en Cumiáns e A Fieira (Montemaior). O investimento total alcanza os 200.000 euros.