- O contrato foi adxudicado a Top Rescue S.L. por un importe de 68.000 euros
A Xunta de Goberno Local celebrada este xoves na Laracha acordou adxudicar a Top Rescue S.L. o contrato dos servizos de salvamento, socorrismo, vixilancia e primeiros auxilios que estará operativo na praia de Caión durante o verán: todos os días desde o 15 de xullo e ata o 15 de setembro en horario de 12:00 a 20:00 horas.
Nos próximos tres meses serán un total de sete socorristas, máis o coordinador xeral, o persoal que se encargará a diario desas funcións para aumentar a seguridade dos bañistas, informar sobre calquera cuestión que afecte á praia e controlar o uso axeitado do areal de acordo ás normativas vixentes e aos condicionantes establecidos pola Bandeira Azul. Ademais, por primeira vez o servizo de salvamento incorporará unha moto acuática apta para realizar traballos de salvamento.
O Concello inviste 68.000 euros neste contrato, que é prorrogable para a temporada de verán do ano 2023.
Licencias urbanísticas
Na Xunta de Goberno Local tamén foron concedidas tres licencias urbanísticas, das cales dúas son para a construción de sendas vivendas unifamiliares nos núcleos de A Calvela (parroquia de Golmar) e A Fonte da Canle (Vilaño).