- Na Xunta de Goberno Local tamén se acordou concorrer á convocatoria de axudas da Consellería de Política Social para un programa de voluntariado sénior
A Xunta de Goberno Local celebrada este xoves na Laracha acordou presentar á Xunta de Galicia un novo proxecto dun programa integrado de emprego ao abeiro da convocatoria de subvencións da Consellería de Emprego e Igualdade. Despois das boas experiencias dos últimos anos nas que se desenvolveron iniciativas de similares características, o Concello aspira a realizar este novo programa dirixido a un máximo de 100 persoas desempregadas que serían informadas, orientadas e asesoradas na busca de emprego con entrevistas individualizadas. Posteriormente tamén recibirían formación transversal e específica sobre determinadas especialidades con demanda de profesionais cualificados nos sectores hostaleiro, loxístico e das novas tecnoloxías. Por último, realizaríanse prácticas profesionais non laborais en empresas.
Este programa foi deseñado para aproveitar as oportunidades laborais que ofrece o termo municipal da Laracha e o seu entorno en sectores con crecente demanda de perfil profesionais. As accións formativas serían orientadas cara eses ámbitos, acompañando aos participantes nos seus itinerarios individualizados para aumentar as súas capacidades. O obxectivo final sería «acadar unha inserción laboral dun mínimo do trinta e sete por cento», afirman desde o goberno local.
Na Xunta de Goberno tamén se acordou que o Concello concorrerá á convocatoria de axudas da Consellería de Política Social para o financiamento dun novidoso programa dirixido a activar e implantar o voluntariado sénior no municipio. A iniciativa iría dirixida a persoas maiores de 55 anos de idade ás que se lles ofrecería a posibilidade de colaborar con diferentes iniciativas en beneficio de diferentes colectivos de poboación vulnerable ou en risco de exclusión. Tamén foron concedidas tres licencias urbanísticas.