A Laracha promove emprego de calidade

2 minutes read

BO RITMO DE ACTUACIÓN NA CONSTRUCIÓN DO VIVEIRO DE EMPRESAS MUNICIPAL

A execución do viveiro de empresas municipal do Concello da Laracha que se está a crear no ámbito do polígono industrial avanza a bo ritmo de actuación. O alcalde, José Manuel López Varela, e os edís Jesús Souto e Rocío López reuníronse co responsable da empresa construtora no lugar no que se están a acometer os traballos e puideron comprobar que a fase de cimentación está moi avanzada.

O novo edificio está a ser construído nun ámbito privilexiado como é a marxe esquerda do acceso principal ao parque empresarial, nunha parcela de titularidade municipal. A súa superficie construída ascenderá a 613,55 metros cadrados, nos que serán habilitados catro despachos e catro naves, ademais de servizos xerais como un vestíbulo recepción, aseos, vestiarios, sala de reunións, aula polivalente e dous patios interiores abertos. O inmoble estará estruturado en dúas zonas e cada unha delas poderá empregarse de xeito independente.

O proxecto de construción do viveiro de empresas está valorado en 395.000 euros e é cofinanciado entre o Concello da Laracha e a Consellería de Economía, Emprego e Industria da Xunta de Galicia.

O viveiro de empresas do Concello da Laracha conformará un espazo físico construído para favorecer o nacemento de novas sociedades de carácter industrial, ofrecéndolles aos emprendedores as condicións e servizos precisos, por un tempo limitado, para a implantación inicial e a consolidación. Deste xeito o Concello apoiará as iniciativas empresariais que contribúan á dinamización industrial, á promoción económica e á creación de emprego no municipio.

Con esta nova infraestrutura o Concello da Laracha pretende dar aos emprendedores o impulso definitivo para que se decidan a levar a cabo os seus proxectos, permitíndolles dispoñer dun espazo empresarial integrado no ámbito dun dos polígonos industriais con maior potencial de desenvolvemento no norte de Galicia.

Estás seguro de que quieres desbloquear este artículo?
Desbloquear izquierda : 0
Estás seguro de que quieres cancelar la suscripción?