A illa da Palma xa é 17 hectáreas máis extensa. A culpa é do volcán cuxo río de magma segue coméndolle terreo ao Océano Atlántico. A fumareda de vapor e gases desprendidos polo contacto coa auga alcanzou xa os 5.000 metros de altura. No municipio de Tazacorte varios núcleos de poboación seguen confinados mentres se estuda a calidade do aire, aínda que os voos coa Palma renováronse na tarde deste xoves.
A partir de agora prevese unha deterioración na calidade do aire por cambios nos ventos. Por iso, os expertos piden á poboación máis próxima ao volcán que extreme as precaucións, e na poboación de Tazacorte xa se mediron valores altos de dióxido de xofre -por encima das normativas sobre calidade do aire, aínda que sen supoñer un perigo para a saúde-. Medíronse puntualmente 500 microgramos de dióxido de xofre (SO2) por metro cúbico, aínda que esta cota baixou xa a 300.
Considérase que o problema pode estenderse a outros municipios próximos, polo que se recomendan precaucións especiais: permanecer en interiores, salvo necesidade, e utilizar máscaras FFP2, sobre todo as persoas con afeccións respiratorias, os anciáns, os nenos e as embarazadas.