- Destacan tamén a importancia de desenvolver un AOR de xeito inmediato e financiar o plan industrial
O candidato á presidencia da Xunta de Galicia, Pancho Casal, a n.º 2 María Chao, e diversas integrantes da candidatura da Marea Galeguista pola provincia da Coruña, reuníronse co Comité de Empresa de Navantia, nunha xuntanza na que lles presentaron o proxecto que a formación ten dentro da súa proposta industrial para Galicia para os estaleiros de Navantia en Ferrol e Fene.
Durante a xuntanza, Pancho Casal salientou tres cuestións esenciais: a primeira delas fai alusión a unha actuación inmediata que podería ser, segundo apuntou, “o desenvolvemento dun AOR, buque para o que xa teñen enxeñería, inda que tiveran que actualizala”. Para Casal, se isto non fose así, “o estaleiro estará ano e medio parado”, polo que instou ao Ministerio de Defensa, ao Ministerio de Industria e ao goberno do estado a “darlle para diante a isto de xeito inmediato”.
Outra cuestión das que sinalou como esenciais é o financiamento do plan industrial, do que asegura “levase falando case tres anos e inda non hai nada orzamentado”. Critica Casal que “o goberno de Podemos e do Partido Socialista en 2019 non dotou ningunha partida para ese plan”, e asegura que “nos novos orzamentos, que se desenvolvan tanto na Xunta de Galicia como no estado, a Marea Galeguista porá como liña vermella que se dote de orzamento ao plan industrial”.
Dende a Marea Galeguista, defenden tamén “un hub da tecnoloxía eólica mariña flotante fixa, pivotado entorno a Navantia” xa que, como indica Pancho Casal, “non pode ser que veña unha empresa de Asturias a desenvolver aquí a súa tecnoloxía cando Navantia ten tecnoloxía de sobra para desenvolver estes proxectos integrais”.
A última cuestión que propuxo ao Comité, como “imprescindible para que todo isto chegue a bo fin” é que a Xunta de Galicia estea no Consello de Administración de Navantia, pois para Casal “iso garantiría que o plan industrial fora adiante”.