- Será este sábado, ás 18:30 horas, na carpa do paseo marítimo
O Concello de Muxía aposta pola tradición e por reflotar a economía local a través da celebración do primeiro magosto postcovid. Grazas á colaboración da asociación Abaladeiras de Muxía, o goberno local deseñou un programa onde a música tradicional galega será protagonista.
A cita será este sábado, a partir das 18:30 horas, no paseo marítimo da vila. Ademais, como novidade haberá un tren asador no recinto que contará coa maquinaria típica das grandes rúas de cidades. O acceso ao recinto e a degustación de castañas serán gratuítos.
Entre os participantes no evento atópase o grupo local ‘Xaramiños do Corpiño’; ‘O Cansorriño’, ‘Vaiche boa’ e ‘Con todo en Banda’ de Camariñas; ‘Mar Devalado’ de Camelle e ‘Petaforte’ de Pereiriña.
O alcalde, Iago Toba, sinalou que «con iniciativas como esta seguimos apostando pola tradición e pola cultura do noso pobo», agradecendo a disposición total das Abaladeiras.