O alcalde da Laracha, José Manuel López Varela, realizou este domingo o primeiro izado da Bandeira Azul 2025 na praia de Caión. Fíxoo xunto ao equipo de salvamento, socorrismo, vixilancia e primeros auxilios, que tamén iniciaba a súa actividade no areal.
A presenza da Bandeira Azul é o distintivo que outorga a Fundación Europea de Educación Ambiental para recoñecer a calidade dos areais e das augas, o cumprimento dunha serie de normas relacionadas coa seguridade, a accesibilidade e os servizos aos usuarios e o esforzo compartido no respecto medioambiental para coidar os espazos naturais costeiros.
O izado da bandeira supón a operatividade de todos os servizos e equipamentos, incluíndo os renovados aseos da praia e a presenza do servizo de salvamento a diario de 12:00 a 20:00 horas durante os próximos tres meses, ata o 15 de setembro. O equipo está formado por oito efectivos -seis socorristas máis dous coordinadores- e será prestado por Top Rescue. O Concello asume integramente con fondos propios municipais o custe do servizo, que ascende a 68.000 euros.
Ademais da Bandeira Azul, a Laracha tamén conta con outros dous distintivos: o Centro Azul do Centro de Interpretación dos Muíños de Auga da Costa da Morte de Golmar e o Sendeiro Azul do Sendeiro de Saldoiro.