Estas sete novas parcelarias suporán a reorganización de case 4.600 hectáreas de superficie, distribuídas en preto de 15.400 parcelas propiedade de 2.300 veciños. En concreto, decretaranse nos concellos de Abadín (zona de Moncelos), Becerreá (zona de Guilfrei), Castroverde (zona de Riomol) e, en función dos resultados dos estudos previos, en Cospeito (tres zonas en Arcillá, Bestar, Vilar, Sisoi; en Roás e en Lamas) e O Páramo (zona de Friolfe).
Estas zonas formarán parte das 23 novas zonas que se decretarán ao longo deste ano en toda Galicia e que suporán a reorganización de 19.394 hectáreas de superficie, distribuídas en 99.340 parcelas propiedade de case 14.000 veciños. Así, ademais das sete localizadas na provincia de Lugo, 6 estarán na da Coruña, 4 na de Ourense e 6 na provincia de Pontevedra.
Estes 23 novos procesos sumaranse ás cinco parcelarias decretadas o pasado ano, as primeiras desde a entrada en vigor da Lei de mellora da estrutura territorial agraria de Galicia. Desta forma, entre os anos 2021 e 2022 decretaranse 28 novas reestruturacións parcelarias, que abarcan un total de 23.613 hectáreas e 107.655 parcelas de máis de 15.500 titulares.